बीड : बीड जिल्ह्यात कधी कोरडा दुष्काळ पडतो तर कधी ओला दुष्काळ पडतो. अस्मानी संकटात या जिल्ह्यातील नागरिक सतत होरपळत आहेत. मात्र, या वेळेस पावसाने कहरच केला आहे. एका बाजूला शेतातील पिकांचं नुकसान झालं, घरं पडली, घरात पाणी शिरलं, धान्य वाहून गेले, शाळेची पुस्तकं वह्या वाहून गेल्या, जनावरे वाहून गेली, पुल वाहून गेले, शेतातील माती वाहून गेली आणि या प्रवाहात बीड तालुक्यातील पिंपळवाडी गावचा एक 10 वर्षाचा शाळकरी मुलगा देखील वाहून गेला. बिंदुसरा नदीला पूर आला आणि होत्याच नव्हतं झालं.
मिळालेल्या अधिकच्या माहितीनुसार, बीड तालुक्यातील पिंपळवाडी येथील रहिवासी असलेला दहा वर्षांचा आदित्य उत्तम कळसाने हा बिंदुसरा नदीच्या पुरात वाहून गेला. ही घटना त्याच्या आई समोरच घडली आणि ती आपल्या लेकराला वाचवण्यासाठी काहीही करु शकली नाही. या घटनेने परिसरात एकच हळहळ व्यक्त केली जात आहे.
आदित्य हा गावातील जिल्हापरिषद शाळेत इयत्ता चौथीमध्ये शिकत होता. शाळेला सुट्टी होती म्हणून आदित्यने त्याच्या आईकडे शेतात जाण्याचा हट्ट केला. आईसोबत मका काढत असताना अचानक ढगफुटी सदृश पाऊस सुरू झाला, यावेळी शेतात काम करण्यासाठी फक्त महिला होत्या. चरण्यासाठी जनावरं सोडली होती, ती बांधण्यासाठी आदित्यच्या आईने त्याचा हात सोडला आणि जनावरे बांधू लागली तेवढ्यात बिंदुसरा नदीला मोठा पूर आला आणि त्या पुराच्या पाण्याच्या प्रवाहात आदित्य वाहून गेला.
आईच्या डोळ्यासमोर आदित्य वाहून गेला, पण ती काहीच करू शकत नव्हती. हतबल आई धावपळ करत होती मात्र मदतीसाठी कोणी पुरुष परिसरात नव्हते. डोळ्यासमोर पोटचा पोरगा पाहून जात होता आणि त्याची आई काहीच करू शकत नव्हती. बघता- बघता मुलगा डोळ्यासमोरून नाहीसा झाला. तब्बल एक तास त्याची शोधाशोध केली आणि शेवटी त्याचा मृतदेह सापडून आला. हे पाहताच त्याच्या आईच्या काळजाचा ठोका चुकला.
गावातील ग्रामस्थांनी त्याचा तासभर पाण्यात शोध घेतला त्यानंतर त्याचा मृतदेह बाहेर काढण्यात आला. या घटनेने कळसाने कुटुंबावर दुःखाचा डोंगर कोसळला आहे. बीडमध्ये झालेल्या पावसात त्यांना आपल्या मुलाला गमवावे लागले. आदित्य गेल्यापासून या घरात चूल देखील पेटली नाही. आदित्यची आई निशब्द आहे. आदित्यला एक मोठा भाऊ आहे तो देखील त्याच जिल्हापरिषद शाळेत पाचवित शिक्षण शिकत आहे. आदित्य हा घरात सर्वात लहान होता. आता त्याच्या पश्चात त्याचे वडील, आई आज्जी, आजोबा, भाऊ असा परिवार आहे. खांद्यावर खेळवलेल्या नातवाला गमवावं लागल्याने आदित्यच्या आजीला आणि आईला पाहून गावकऱ्यांच्याही डोळ्यात पाणी आलं.
