भारतीय जनता पक्षाच्या राष्ट्रीय सचिव पंकजा मुंडे (Pankaja Munde) यांनी तब्बल 2 महिन्यांच्या विश्रांतीनंतर मोठी घोषणा केली आहे. गेल्या 2 महिन्यांपासून सुट्टीवर असलेल्या पंकजा मुंडे पुन्हा एकदा सक्रिय झाल्या आहेत.
पंकजा मुंडे यांनी ट्वीट करत शिवशक्ती यात्रेची घोषणा केली आहे. सप्टेंबर महिन्याच्या पहिल्या आठवड्यापासून पंकजा मुंडे यांचा राज्यात 11 दिवसांचा दर्शन दौरा सुरू होणार आहे.
पंकजा मुंडे सप्टेंबर महिन्यांच्या पहिल्या आठवड्यापासून राज्यातल्या 10 हून जास्त जिल्ह्यांचा दौरा करणार आहेत. विशेष म्हणजे हा दौरा केवळ देवदर्शनासाठी असेल असे पंकजा मुंडे यांनी जाहीर केले आहे. शिवशक्ती यात्रेदरम्यान पंकजाताई राज्यात एकूण 5000 किलोमीटरचा दौरा करतील.
या दौऱ्याची सुरुवात छत्रपती संभाजीनगर जिल्ह्यातील वेरुळ येथील घृष्णेश्वर मंदिराच्या दर्शनापासून होईल. घृष्णेश्वर मंदिर हे 12 ज्योर्तिलिंगापैकी एक आहे.
त्यानंतर नाशिक, अहमदनगर, पुणे, सातारा, कोल्हापूर आणि इतर जिल्ह्यातील देवदर्शन करणार आहेत. अशी माहिती पंकजा मुंडे यांनी खुद्द दिली आहे.
