गेल्या 2 दिवसांपासून राज्यात पावसाचा जोर वाढला आहे. मुंबई, नवी मुंबई, ठाणे, सिंधुदुर्ग, रायगड, रत्नागिरी या जिल्ह्यांना पावसाने झोडपून काढले आहे. कोकणातील अनेक गावात पुरसदृश स्थिती निर्माण झाली आहे.
तसेच ठाणे आणि परिसरातही मुसळधार पावसामुळे जनजीवन विस्कळीत झाले आहे. आजही राज्यात मुसळधार पावसाची शक्यता आहे. आज राज्यात पावसाची स्थिती कशी असेल ते जाणून घेऊयात..
या जिल्ह्यांना अतिवृष्टीचा इशारा, रेड अलर्ट जारी
आज मुंबई आणि उपनगरासह कोकणात अतिवृष्टीचा इशारा देण्यात आला आहे. आज सिंधुदुर्ग, रत्नागिरी जिल्ह्यांना रेड अलर्ट जारी करण्यात आला आहे. तसेच ठाणे, मुंबई, रत्नागिरी जिल्ह्यांना यलो अलर्ट देण्यात आला आहे. त्यामुळे नागरिकांनी कामाशिवाय घराबाहेर न पडण्याचं आवाहन करण्यात आले आहे. तसेच पुणे, कोल्हापूर, सातारा, नाशिक जिल्ह्यांत देखील आज मुसळधार पावसाची शक्यता IMD कडून वर्तवण्यात आली आहे. या भागाला यलो अलर्ट जारी करण्यात आला आहे.
या जिल्ह्यांमधील शाळा-कॉलेजला सुट्टी
गेल्या दोन दिवसांपासून रत्नागिरी आणि सिंधुदुर्ग जिल्ह्यांत अतिमुसळधार पाऊस सुरु आहे. त्यामुळे खबरदारीचा उपाय म्हणून रत्नागिरी जिल्हा प्रशासनाने शाळा आणि कॉलेजला सोमवारी 8 जुलै रोजी सुट्टी जाहीर केली आहे. निवासी उपजिल्हाधिकारी चंद्रकांत सूर्यवंशी यांनी याबाबत आदेश जारी केला आहे. त्याचबरोबर सिंधुदुर्ग जिल्ह्यातील प्राथमिक आणि माध्यमिक शाळांनाही आज सुटी जाहीर करण्यात आली आहे. शिक्षण मंत्री दीपक केसरकर यांनी अधिकाऱ्यांना याबाबतचे आदेश दिले आहेत.
