अहिल्यानगर – राज्यात पावसाने पुन्हा जोर पकडण्याची शक्यता निर्माण झाली असून, सप्टेंबर महिन्याच्या अखेरीस पावसाचा धुमाकूळ पाहायला मिळण्याची शक्यता आहे. हवामान विभागाच्या विस्तारित अंदाजानुसार 21 ते 28 सप्टेंबरदरम्यान राज्याच्या मध्यवर्ती भागात पावसाचा जोर वाढण्याची शक्यता आहे. मुंबई, कोकण विभाग तसेच घाटमाथ्यावरही पावसाच्या सरींचा जोर राहण्याचा अंदाज व्यक्त करण्यात आला आहे.
दरम्यान, भारतीय हवामान विभागाच्या 17 सप्टेंबरच्या विस्तारित अंदाजानुसार 19 सप्टेंबरच्या आसपास अंदमान समुद्र आणि लगतच्या परिसरात कमी दाबाचे क्षेत्र तयार होण्याची शक्यता आहे. या हवामान प्रणालीच्या पुढील वाटचालीनुसार राज्यातील पावसाच्या स्थितीत बदल होण्याची शक्यता आहे.
परतीच्या पावसासारखा जोर?
सप्टेंबरच्या अखेरीस सक्रिय होणारा पाऊस अनेक भागांत जोरदार सरींच्या स्वरूपात बरसण्याची शक्यता आहे. त्यामुळे हा पाऊस परतीच्या पावसासारखा जोरदार ठरणार का, याकडे शेतकरी आणि नागरिकांचे लक्ष लागले आहे. मात्र, पावसाची तीव्रता आणि नेमका कोणता भाग अधिक प्रभावित होईल, याबाबतचे अंदाज पुढील दिवसांत अधिक स्पष्ट होणार आहेत.
शेतकऱ्यांसाठी महत्त्वाचा काळ
सध्या राज्यातील अनेक भागांत खरीप पिके काढणीच्या टप्प्यात आहेत. त्यामुळे सप्टेंबरअखेरीस जोरदार पाऊस झाल्यास शेतीकामांवर त्याचा परिणाम होऊ शकतो. दुसरीकडे, पावसाची प्रतीक्षा असलेल्या भागांना या पावसामुळे काहीसा दिलासा मिळण्याची शक्यता आहे.
हवामान विभागाकडून पुढील काही दिवसांत जिल्हानिहाय आणि दिवसनिहाय पावसाचे अंदाज व इशारे अधिक स्पष्ट केले जाणार आहेत. त्यामुळे नागरिकांसह शेतकऱ्यांनी हवामान विभागाच्या ताज्या सूचनांकडे लक्ष ठेवणे आवश्यक आहे.
