मुंबई : साहित्य, संस्कृती आणि राजकारणाचा अनोखा संगम नुकताच एका पुस्तक प्रकाशन सोहळ्यात पाहायला मिळाला. प्रशांत कुलकर्णी यांच्या ‘हास्यरेषा’ या पुस्तकाचे प्रकाशन मुख्यमंत्री देवेंद्र फडणवीस यांच्या हस्ते करण्यात आले. ग्रंथालीच्या वतीने आयोजित या कार्यक्रमाला सांस्कृतिक मंत्री आशिष शेलार, माजी मुख्यमंत्री उद्धव ठाकरे, मनसे अध्यक्ष राज ठाकरे आणि मुख्यमंत्री देवेंद्र फडणवीस हे दिग्गज नेते एकाच मंचावर उपस्थित होते. या अनोख्या राजकीय उपस्थितीपेक्षा राज ठाकरे यांच्या मिश्कील भाषणाने मात्र कार्यक्रमात विशेष रंगत आणली.
या कार्यक्रमात राज ठाकरे यांनी आपल्या खास शैलीत दिलखुलास भाषण केले. त्यांच्या भाषणातील विनोद, मिश्कील टिप्पणी आणि राजकीय संदर्भांमुळे उपस्थितांमध्ये वारंवार हशा पिकला. विशेष म्हणजे, सांस्कृतिक मंत्री आशिष शेलार यांनी केलेल्या एका विधानाचा धागा पकडत राज ठाकरे यांनी थेट मुख्यमंत्री देवेंद्र फडणवीस यांच्यावरच मिश्कील टोला लगावला.
काय म्हणाले राज ठाकरे?
कार्यक्रमात बोलताना आशिष शेलार म्हणाले की, ‘राज ठाकरेंनी बोलावलं की देवेंद्र फडणवीस नेहमी येतातच.’ शेलार यांच्या या विधानावर राज ठाकरे यांनी आपल्या खास शैलीत प्रतिक्रिया दिली.
राज ठाकरे म्हणाले, ‘आशिष शेलार आत्ता म्हणाले की राज ठाकरेंनी बोलवलं की मुख्यमंत्री येतातच. मी यापुढेही मुख्यमंत्र्यांना बोलवत जाईन आणि ते येतील. २०२९ पर्यंत मुख्यमंत्र्यांना ठेवा म्हणजे झालं.’
राज ठाकरे यांच्या या एका वाक्याने सभागृहात एकच हशा पिकला. त्यांच्या या वक्तव्याला उपस्थितांनीही उत्स्फूर्त प्रतिसाद दिला. पुढे ‘आता मी काय सांगू?’ असे म्हणत त्यांनी आपल्या भाषणातील मिश्कीलपणा कायम ठेवला.
राजकीय नेत्यांच्या एकत्रित उपस्थितीचीही चर्चा
या पुस्तक प्रकाशन सोहळ्याच्या निमित्ताने मुख्यमंत्री देवेंद्र फडणवीस, माजी मुख्यमंत्री उद्धव ठाकरे आणि मनसे अध्यक्ष राज ठाकरे हे तिन्ही नेते एकाच मंचावर आल्याने या कार्यक्रमाला विशेष महत्त्व प्राप्त झाले. सांस्कृतिक मंत्री आशिष शेलार यांचीही उपस्थिती होती. साहित्यिक कार्यक्रमाच्या निमित्ताने राज्याच्या राजकारणातील महत्त्वाचे चेहरे एकत्र आल्याने या मंचाकडे सर्वांचे लक्ष वेधले गेले.
प्रशांत कुलकर्णी यांच्या ‘हास्यरेषा’ पुस्तकाच्या प्रकाशनाचा हा सोहळा राज ठाकरे यांच्या मिश्कील भाषणामुळे अधिकच रंगतदार ठरला. विशेषतः ‘२०२९ पर्यंत देवेंद्र फडणवीसांना मुख्यमंत्री ठेवा म्हणजे झालं’ या त्यांच्या विधानाची कार्यक्रमात चांगलीच चर्चा रंगली. राजकीय संदर्भाला विनोदाची फोडणी देत राज ठाकरे यांनी आपल्या खास वक्तृत्वशैलीची पुन्हा एकदा झलक दाखवून दिली.
