जिल्हा परिषद, पंचायत समिती निवडणूकांची नवीन तारीख जाहिर, “या” दिवशी होणार मतदान

उपमुख्यमंत्री अजित पवार यांच्या अपघाती निधनामुळे महाराष्ट्र राज्य सरकारने तीन दिवसांचा शासकीय दुखवटा जाहीर केला आहे. या पार्श्वभूमीवर, राज्य निवडणूक आयोगाने 12 जिल्हा परिषदा आणि 125 पंचायत समित्यांच्या सार्वत्रिक निवडणुकांच्या उर्वरित टप्प्यांच्या वेळापत्रकात मोठे बदल केले आहेत. आता नियोजित 5 फेब्रुवारीऐवजी 7 फेब्रुवारी 2026 रोजी मतदान पार पडणार आहे.

निवडणुकीचे नवीन वेळापत्रक

प्रचार समाप्ती – 5 फेब्रुवारी 2026 (रात्री 10 वाजता).

मतदान – 7 फेब्रुवारी 2026 (सकाळी 7.30 ते सायंकाळी 5.30 वाजेपर्यंत).

मतमोजणी – 9 फेब्रुवारी 2026 (सकाळी 10 वाजल्यापासून).

निकाल प्रसिद्धी – निवडून आलेल्या सदस्यांची नावे 11 फेब्रुवारी 2026 पर्यंत राजपत्रात प्रसिद्ध केली जातील.

का झाला बदल?

उपमुख्यमंत्री अजित पवार यांचे 28 जानेवारी 2026 रोजी अपघाती निधन झाले. त्यांच्या सन्मानार्थ राज्य शासनाने 28 जानेवारी ते 30 जानेवारी 2026 पर्यंत राज्यात तीन दिवसांचा दुखवटा जाहीर केला आहे. या कालावधीचा विचार करून निवडणूक आयोगाने मतदानाचा टप्पा दोन दिवस पुढे ढकलण्याचा निर्णय घेतला आहे.

पुढील प्रक्रिया

निवडणुकीसाठी नामनिर्देशनपत्र दाखल करणे, चिन्हांचे वाटप आणि अंतिम उमेदवारांची यादी प्रसिद्ध करणे हे टप्पे आधीच पूर्ण झाले आहेत. आता केवळ मतदान, मतमोजणी आणि राजपत्रात नावे प्रसिद्ध करणे हेच टप्पे शिल्लक आहेत. संबंधित जिल्ह्यांचे जिल्हाधिकारी 31 जानेवारी 2026 रोजी या सुधारित निवडणूक कार्यक्रमाची अधिकृत सूचना प्रसिद्ध करतील. मतमोजणीनंतर निकाल जाहीर होताच संबंधित ठिकाणची आचारसंहिता संपुष्टात येईल, असेही आयोगाने स्पष्ट केले आहे.

राज्यातील 12 जिल्हा परिषदा आणि 125 पंचायत समित्यांची निवडणूक

राज्यातील 12 जिल्हा परिषदा आणि त्या अंतर्गतच्या 125 पंचायत समित्यांच्या सार्वत्रिक निवडणूक पार पडणार आहे. जिल्हा परिषदांच्या एकूण 731, तर पंचायत समित्यांच्या 1 हजार 462 जागांसाठी ही निवडणूक होत आहे. रायगड, रत्नागिरी, सिंधुदुर्ग, पुणे, सातारा, सांगली, सोलापूर, कोल्हापूर, छत्रपती संभाजीनगर, परभणी, धाराशिव आणि लातूर या 12 जिल्हा परिषदा आणि त्यांतर्गतच्या 125 पंचायत समित्यांसाठी ही निवडणूक होत आहे.

जिल्हा परिषदेच्या जागांचा तपशील

एकूण जिल्हा परिषदा- 12

एकूण जागा- 731

महिलांसाठी जागा- 369

अनुसूचित जातींसाठी जागा- 83

अनुसूचित जमातींसाठी जागा- 25

नागरिकांचा मागासवर्ग प्रवर्गासाठी जागा- 191

पंचायत समित्यांच्या जागांचा तपशील

एकूण पंचायत समित्या- 125

एकूण जागा- 1,462

महिलांसाठी जागा- 731

अनुसूचित जातींसाठी जागा- 166