पारनेर : तालुक्यातील देवीभोयरे येथील पारनेर सहकारी साखर कारखान्याच्या जमिनीचा निकाल नुकताच सभासदांच्या बाजूने लागलेला असून, लवकरच शेतकरी, सभासद कारखान्याचा ताबा घेणार आहेत. त्यासाठी जनजागृती मोहीम कारखाना बचाव समितीने हाती घेतलेली आहे. कारखाना कार्यक्षेत्रात गावोगावी बचाव समिती बैठकांचे आयोजन करून जनजागृती करत आहे . पारनेर तालुक्यातील उत्तरेकडील बागायती पट्टा असलेला मांडवे खुर्द परिसर येथे कारखाना बचाव व पुर्नजिवन समितीच्या कार्यकर्त्यांनी एक बैठक आयोजित केली होती.
या बैठकीला मांडवे , देसवडे ,तास , वनकुटे परिसरातून मोठ्या संख्येने शेतकरी / सभासद हजर होते . पारनेर साखर कारखाना भ्रष्ट मार्गाचा वापर करून पुणे येथील क्रांती शुगर या खाजगी कंपनीने कसा बळकावला आहे , याची सविस्तरपणे माहिती यावेळी सभासदांना देण्यात आली . कारखाना विक्री मागे कोणाचा हात होता , तो का विकण्यात आला व त्यामुळे पारनेरकरांवर कसा अन्याय करण्यात आला याची सविस्तर माहिती बचाव समितीचे रामदास घावटे यांनी दिली . कारखाना विषयीचे विविध खटले सध्या मुंबई उच्च न्यायालयाच्या औरंगाबाद खंडपीठात दाखल असून ते निकालाच्या अंतिम टप्प्यात आहेत . याचीही सविस्तर माहिती घावटे यांनी सभासदांना दिली.
पारनेर साखर कारखान्याचे आता पुर्नजिवन होत असुन ,
कारखान्याचे सुमारे वीस हजार सभासद आहेत. त्यांचे सभासदत्व आता जिवंत होणार असल्याची माहिती बबनराव सालके यांनी दिली.
पारनेर साखर कारखान्याच्या अंतिम टप्प्यातील लढाईत आमचा मांडवे खुर्द परिसर सदैव बचाव समितीच्या पाठीशी राहून साथ देईल असे आश्वासन येथील ऊस बागायतदार जगदीश गागरे यांनी दिले.
पारनेर सहकारी साखर कारखान्याच्या न्यायालयीन लढाईत समितीचा विजय झालेला आहे. आता या पुढील लढाईत बचाव समितीला पूर्ण साथ द्यावी असे आवाहन शेतकरी संघटनेचे संतोष वाडेकर यांनी यावेळी केले. निकालानंतर आता ताबा घेतला जाईल त्यावेळी कुणी हरकत अडथळा निर्माण केला तर जशाच तसे उत्तर देऊ अशी संतप्त भावना मांडवेतील जेष्ठ सभासदांनी व्यक्त केली. यावेळी पारनेर कारखाना बचाव समिती व महसूल मंत्री राधाकृष्ण विखे पाटील यांच्या अभिनंदनाचा ठराव मंजूर करण्यात आला.
यावेळी संतोष वाडेकर, जगदीश पाटील गागरे, बबनराव सालके, भाऊसाहेब टेकुडे, श्रीरंग पाटील गागरे, संतोष टेकुडे, पांडूरंग दरेकर, पांडुरंग गागरे, बाळासाहेब गागारे, संभाजीराव सालके, दत्तात्रय पवार, बाळासाहेब सालके, शंकर गुंड, सुनील चौधरी, अविनाश भोर, दत्ता फटांगरे, संजय भोर, भाऊसाहेब मॅनेजर, उत्तम भोर,पांडुरंग जाधव, सुदाम जाधव, संतोष जाधव, बाळासाहेब सचिव, संतोष बागुल, धावळू बागुल, शशिकांत टेकुडे, लहानू हुलावळे, बाळासाहेब दरेकर, आहेर गुरुजी, नंदन भोर, पत्रकार गणेश जगदाळे, रावसाहेब गागरे, बाबासाहेब वाडेकर, शंकर भोर, रामदास कानडे, विजय भोर, बबन भोर, रामचंद्र गागरे रामदास गागरे, अशोक गागरे, यांच्यासह सभासद व ऊस उत्पादक मांडवे खुर्द परिसरातून मोठ्या संख्येने नागरिक उपस्थित होते.
