डॉक्टर महिलेकडून एका नर्सला घरात घुसून बेदम मारहाण केल्याचा धक्कादायक प्रकार अहमदनगरमधून समोर आला आहे. अहमदनगरच्या श्रीगोंदा तालुक्यातील बेलवंडी गावात ही घटना घडली असून या मारहाणीचा व्हिडिओ सध्या सोशल मीडियावर व्हायरल होत आहे. या धक्कादायक घटनेने सर्वत्र संतापाची लाट उसळली आहे.
अहमदनगर जिल्ह्याच्या श्रीगोंदा तालुक्यातील बेलवंडी गावात एका नामवंत डॉक्टर महिलेने एका नर्सच्या घरात घुसून लोखंडी गजाने मारहाण केल्याचा प्रकार घडला. मारहाण करतानाचा व्हिडिओ सोशल मीडियावर व्हायरल झाला असून नागरिक संताप व्यक्त करत आहेत. डॉ. माधुरी जगताप असे मारहाण करणाऱ्या डॉक्टर महिलेचे नाव असून या प्रकरणी बेलवंडी पोलीस ठाण्यात गुन्हा दाखल करण्यात आला आहे.
डॉ.माधुरी जगताप यांनी येऊन माझ्या नवऱ्याच्या मोबाईलवर मॅसेज का करतेस? अशी विचारणा करत मारहाण केल्याचे पीडित नर्सने सांगितले. डॉक्टर महिलेने हातातील पाईपमध्ये लोखंडी गज टाकून कपाळावर, डोक्यात, डाव्या हाताच्या मनगटाजवळ, उजव्या पायाच्या गुडघ्यावर, गजाने मारहाण करून मला जखमी करून केस धरून मला खाली पाडले तसेच गळ्यातील सोन्याचे मंगळसूत्र तोडले, अशी तक्रार नर्स महिलेने केली आहे.
तसेच ‘पुन्हा जर नादी लागली तर तुला फाशी देऊन मारीन आणि गावात राहिली तर तुला सुपारी देऊन मारून टाकील, कोणत्याही हॉस्पिटलमध्ये काम करू देणार नाही’, अशी धमकीही दिल्याचे पीडीत महिलेने आपल्या फिर्यादीत म्हटले आहे. याप्रकरणी बेलवंडी पोलीस ठाण्यात तक्रार दाखल करण्यात आली आहे. पोलीस अधिक तपास करत आहेत.
