राज्यातील पावसाचा जोर गेल्या दोन दिवसापासून कमी झाला आहे. त्यामुळे नागरिकांना उसंत मिळाली आहे. मुसळधार पावसामुळे जनजीवन विस्कळीत झाले होते. या पावसामुळे अनेकांना त्रासाचा सामना करावा लागला होता, मात्र आता पावसाने विश्रांती घेतल्याचे हवामान विभागाकडून सांगण्यात आले आहे.
मात्र आज राज्याच्या काही भागात पावसाची शक्यता आहे. आज 5 जिल्ह्यांना IMD कडून पावसाचा अलर्ट जारी करण्यात आला आहे. आज राज्याच्या कोणत्या भागात कसे हवामान असेल ते सविस्तर जाणून घेऊयात.
आज या 6 जिल्ह्यांमध्ये पावसाची शक्यता
हवामान विभागाने आज पुणे, रायगड, धुळे, अमरावती, वर्धा, यवतमाळ या 6 जिल्ह्यांमध्ये पावसाची शक्यता वर्तवली आहे. त्यामुळे या सर्व जिल्ह्यांना आज पावसाचा यलो अलर्ट जारी करण्यात आला आहे. आज या सर्व जिल्ह्यातील नागरिकांनी योग्य ती खबरदारी घेऊन घराबाहेर पडावे असं आवाहन प्रशासनाने केले आहे. या सर्व जिल्ह्यांमधील काही भागात वादळी वाऱ्यासह मुसळधार पावसाचीही शक्यता हवामान विभागाने वर्तवली आहे.
पुढील 2 दिवस घाटमाथ्यावर पावसाची शक्यता
हवामान विभागाने आजपासून पुढील 2 दिवस राज्यातील घाट विभागात पावसाची शक्यता वर्तवली आहे. आज पुणे जिल्ह्याच्या घाट विभागात तर आज आणि उद्या तर रायगड, रत्नागिरी व सातारा जिल्ह्यांच्या घाट क्षेत्रात तुरळक ठिकाणी मुसळधार पावसाची शक्यता वर्तवली आहे. त्यामुळे या भागाला पावसाचा रेड अलर्ट जारी करण्यात आला आहे.
या जिल्ह्यांमध्ये तुरळक ठिकाणी पावसाची शक्यता
आज हवामान विभागाने धुळे, जळगाव, नाशिक, अहमदनगर, छत्रपती संभाजी नगर, जालना व बीड या जिल्ह्यांमध्ये व विदर्भातील काही जिल्ह्यांमध्ये तुरळक ठिकाणी वादळी वाऱ्यासह हलका ते मध्यम स्वरुपाच्या पावसाची शक्यता वर्तवली आहे. त्यामुळे या सर्व जिल्ह्यांमधील शेतकऱ्यांनी व नागरिकांनी योग्य ती खबरदारी घेण्याचे आवाहन करण्यात आले आहे.
